Preto de 180 alumnos do Instituto de Mos participaron nun obradoiro sobre sexualidade

Escrito por Concello de Mos. Posteado en Actualidade

Foi impartido no propio centro educativo por profesionais médicos do Centro de Orientación Familiar de Vigo

 

A concelleira de Educación e Participación Cidadá, Kely Monzón, informou hoxe de que un total de 174 alumnos e alumnas do IES de Mos foron os beneficiarios dos obradoiros sobre sexualidade desenvolvidos no marco do programa “Ciclo de vida adolescente”.

 

Ditos obradoiros, impartidos ós estudiantes de 3º e 4º cursos da E.S.O. do Instituto mosense durante as xornadas de hoxe e o pasado luns, día 8 de abril, contaron como ponentes con Eduardo Yáñez González, xefe de sección do Centro de Orientación Familiar de Vigo, e María Ascensión Fraga Fernández, psicóloga tamén do COF de Vigo. O obradoiro do día 8 levou por título “Sexualidade e anticoncepción”, mentres que o de hoxe titulouse “Sexualidade e adolescencia”.

 

Esta iniciativa, segundo explicou Monzón, desenvolveuse para complementar os recursos escolares e académicos en tempo lectivo e horario escolar, e programouse en colaboración estreita co centro educativo.

 

Os centros educativos constitúen espazos de socialización esenciais no desenvolvemento integral de alumnos e alumnas. O período escolar é unha das etapas máis significativas na vida das persoas, onde transcorren moitas das experiencias que repercuten directa e indirectamente na formación da personalidade. O centro escolar é testemuña e axente implicado na evolución e cambios que se producen no alumnado, non só na transición de etapas vitais (neno/a, adolescente, adulto/a), senón da construcción dunha identidade e personalidade propia.

 

Enmarcada nas materias de carácter transversal, áchase a educación para a saúde, e como área incluída na saúde, esta formación sobre sexualidade impartida no IES de Mos contribúe ó traballo das familias na formación integral das rapazas e dos rapaces.

 

“Polo xeral os docentes de Mos demandan profesionais especializados nas materias ás que se refire esta proposta formativa, de cara á elaboración e implementación de intervencións específicas, deseñadas dende unha perspectiva técnica e científica; de ahí que dende o Concello se decidise organizar esta actividade que resultou ter tan boa acollida”, declarou a edil responsable da mesma.